2022 Communications Flyer TN

Lobaka lo lo fetang dingwaga di le masome a mabedi tse di fetileng, ke ne ka simolola Letlole la Kganya Benefits (“ Letlole ”) ke le bulela phuthego ya ZCC. Ka kaelo ya me Letlole leno le ile ka dingwaga di le dintsi, la thusa maloko a ZCC a a ntshang moneelo wa one kgwedi le kgwedi e bile ba le mo boemong jo bontle (“ maloko a a thusiwang ke letlole ”). Dithuso tseno di akaretsa go thusiwa ka phitlho e e sa tureng, bolwetse jo bo masisi le kotsi (“ dithuso tsa inshorense ”); le dithuso tse dingwe tse di tshwanang le dithuso tsa Leeto la Moria, dithuso tsa fa o nna le mathata mo tseleng, dithuso tsa tsamaiso ya phitlho; le melemo ya tshekatsheko ya itekanelo (mo malokong a komiti ya kereke a e leng maloko a a thusiwang ke letlole leno) (“ dithuso tse e seng tsa inshorense ”). Nna le maloko a mangwe a Letlole, re ile ra nna ra tlhomamisa ka metlha gore Letlole leno le dira tumalanong le melao e e maleba. Gore Letlole leno le nne le ntse le dira tumalanong le molao o o beilweng le tshwanelwa ke go dira diphetogo dingwe ka ntlha ya diphetogo tse di dirilweng mo molaong wa diinshorense tse di amang tsela e Letlole leno le dirang ka teng. Ka gone go tlhokega gore go dirwe diphetogo dingwe mo tsamaisong ya Letlole, le phetogo le/kgotsa go phimolwa le go tsenngwa ga melao e mesha ya Letlole. Phetogo eno e tla ama ka bobedi dithuso tsa inshorense le tse e seng tsa inshorense (fa di kopane di bidiwa “ diphetogo ”). Tokumente eno e itsise ka diphetogo tse di diregang mo go nneng ga gago leloko ka ntlha ya diphetogo tseno. Direkoto tsa rona di bontsha gore o leloko la Letlole leno e bile o a tshwanelega go bona dithuso jaaka leloko. Fa o se leloko la Letlole leno mme ka gone o sa tshwanelege jaaka leloko go bona dithuso, o ka nna wa itlhokomolosa kitsiso eno. Jaaka leloko la Letlole leno, nka go tlhomamisetsa gore go dirilwe sotlhe se se tlhokegang go tlhomamisa gore dithuso tsa gago ga di fetoge le gore ditsagago jaaka leloko le le tshwanetseng go bona dithuso mo letloleng leno di a sirelediwa e bile ga di na go amega ka tsela epe e e sa siamang ka ntlha ya diphetogo tseno. Gore diphetogo tse di dirwang mo tsamaisong ya Letlole di kgone go dumelelwa, maloko a Letlole a tlile go dira kopo kwa kwa Kgotla Kgolo ya Aforika Borwa (ya Gauteng, kwa Pretoria) tumalanong le karolo 13 ya Molawana wa Taolo ya Dithoto Tsa Letlole wa bo57 wa 1988 (Trust Property Control Act 57 of 1988) (“ Kopo mo Kgotlatshekelo ”) go dumelela diphetogo. Go tswa foo Kgotla Kgolo e tla sekaseka diphetogo tseno ka kelotlhoko, le go tlhomamisa gore ditsagago jaaka leloko le le tshwanetseng go bona dithuto di a sirelediwa. Boikaelelo jwa kitsiso e e botlhokwa eno ke go tlhalosa ka botlalo diphetogo, le gore di tlile go ama jang ditshwanelo tsa gago jaaka leloko le le tshwanetseng go bona dithuto mo Letloleng. Go Nna Leloko mo Letloleng • Fa o le leloko la Letlole, o tla nna o ntse o le leloko la Letlole. • O tla tshwanelega e bile o tla nna o ntse o tshwanelega go nna leloko le le tshwanetseng go bona dithuso mo Letloleng, fa fela o ntse o ntsha moneelo wa kgwedi le kgwedi wa go nna leloko. Go ntshiwa ga meneelo ya go nna leloko • Jaaka leloko la Letlole, o tshwanetse go nna o ntsha moneelo wa kgwedi le kgwedi wa go nna leloko kwa makaleng a a farologaneng a Kereke. Go tla go fitlha jaanong, o ntse o newa rasiti fa o ntsha moneelo wa kgwedi le kgwedi wa go nna leloko. • Dikomiti tsa kereke di tla tsenya madi ao a moneelo mo akhaontong ya banka ka leina la Letlole. • Fa o ntsha meneelo ya kgwedi le kgwedi, o tlhomamisa gore o leloko la Letlole le le tshwanelwang ke go bona dithuso. • Tsweetswee ela tlhoko gore madi a moneelo a o a ntshang kgwedi le kgwedi gore o nne leloko la letlole e tla nna e ntse e le one a o ntseng o a ntsha mme ga a na go fetolwa kgotsa go angwa ke diphetogo tse di diregang. Dithuso tsa inshorense: dithuso tsa phitlho, tsa bolwetse bongwe jo bo masisi le tsa fa o nnile le kotsi • Gone jaanong, maloko otlhe a a ntseng a bona dithuso a ntse a thusiwa mo mabakeng a phitlho, a bolwetse jo bo masisi le a go tlhagelwa ke kotsi go dirisiwa dipholisi tse di bonweng ke Letlole leno e bile di laolwang ke Sanlam Developing Markets Limited (“ Sanlam ”). • Lefa go ntse jalo, ka ntlha ya phetogo e e dirilweng mo molaong wa diinshorense, Letlole leno le Sanlam ga di tlhole di tswelela ka dipholisi tsa setlamo seno.

RkJQdWJsaXNoZXIy MTI4MTE=