2022 Communications Flyer SP

Mengwaga ya go feta ye masome a mabedi yeo e fetilego, ke hlamile Therasete ya Kganya ya Dikholego tša Mašeleng (“ Therasete ”) ya go hola phuthego ya ZCC. Ka fase ga taolo ya ka, Therasete mo mengwageng ye mentši e file phihlelelo go dikholego tša motheo go maloko a ZCC ao a lefelago ditefelo tša bona tša kgwedi le kgwedi tša boleloko ebile a le maemong a mabotse (“ dikholego tša leloko ”). Dikholego tše di akaretša khava ya poloko ya go seketša, bolwetši bjo bošoro le kotsi ya motho (“ dikholego tšeo di inšorilwego ”); le dikholego tše dingwe tša go swana le tša Leeto la Moria, tša thušo ya ge o šaretšwe o le ka thoko ga tsela, tša tshepedišo ya tša poloko; le dikholego tša tekolo ya maphelo ye botse (mo mabakeng a maloko a komiti ya kereke ao e lego maloko a dikholego) (“ dikholego tšeo di sego tša inšoriwa ”). Nna le bahlokomedi ba gešo ba Therasete, ke dula ke netefatša gore ditshepedišo tša Therasete di obamela melao ya maleba ka botlalo. Ka lebaka la go dula re obamela malao ka botlalo, Therasete ga e na kgetho, efela go tšentšha tirišong diphetogo tše itšeng ka lebaka la phetogo ya molao wa inšorentshe yeo e amago mokgwa woo Therasete e šomago ka wona. Phetošo go tiro ya molao wa Therasete, le phetošo le/ goba go fediša le go bea legatong ga melawana yeo e ntšhitšwego ke Therasete, ka gona e a nyakega. Diphetošo di tla ama bobedi dikholego tšeo di inšorilwego le dikholego tšeo di sego tša inšorwa (ge di kopantšwe di bitšwa “ diphetogo ”). Sengwalwa se se rwele tsebišo ya diphetogo go boleloko bja gago bjalo ka dipoelo tša go swana le diphetošo tšeo. Direkhoto tša rena di laetša gore o moleloko wa Therasete ebile o swanelwa ke go ba moholegi. Ge eba ga o leloko la Therasete ebile o sa swanelwe ke go ba moholegi, o ka hlokomologa tsebišo ye. Bjalo ka mohlokomedi wa Therasete, nka go netefaletša gore maiteko afe le afe a dirilwe go netefatša gore dikholego tša gago di dula di swana gomme dikgahlego tša gago bjalo ka moholegi di šireletšegile ebile di ka se amege go šoro bjalo ka ditlamorago tša diphetogo tšeo di nyakegago. Gore go dumelelwe diphetogo, basepediši ba Therasete ba tla kgopela Kgorotsheko ya Godimo ya Afrika Borwa (Sekgao sa Gauteng, Pretoria) go ya le ka karolo ya 13 ya Molao wa 57 wa 1988 wa Taolo ya Dithoto tša Therasete (Trust Property Control Act 57 of 1988) (“ Kgopelo ya Kgorotsheko ”) gore e dumelele diphetogo. Kgorotsheko ya Godimo ka go realo e tla šetša diphetogo ka tlhoko, gomme ya netefatša gore dikgahlego tša gago bjalo ka moholegi di dula di šireletšegile. Nepo ya tsebišo ye ya bohlokwa ke go hlaloša ka botlalo diphetogo, le khuetšo go ditokelo tša gago o le mongwadišwa bjang, bjalo ka moholegi. Boingwadišo go Therasete • Ge eba o leloko la Therasete, o tla dula o le leloko la Therasete. • O tla swanelwa wa ba wa tšwela pele go swanelwa bjalo ka moholegi, yoo a nago le maswanedi a dikholego tša Therasete, ge fela o lefela ditefelo gago tša boleloko tša kgwedi le kgwedi. Tefo ya ditefelo tša boleloko • Bjalo ka leloko la Therasete, o swanetše go tšwela pele ka go lefela ditefelo tša gago tša boleloko tša kgwedi le kgwedi makaleng a go fapafapana a Kereke. Ka ge e be e dutše e le setlwaedi sa go ngwala letšatšikgwedi, rasiti e tla abelwa wena nako ye o lefela ditefelo tša gago tša boleloko tša kgwedi le kgwedi. • Komiti ya kereke e tla tsentšha ditšhelete tša ditefelo tša boleloko ka gare ga akhaonte ya panka ka leina la Therasete. • Ka go lefela ditefelo tša gago tša boleloko tša kgwedi le kgwedi, o netefatša boleloko bja gago go Therasete bjalo ka moholegi. • O kgopelwa go hlokomela gore ditefelo tša gago tša boleloko tša kgwedi le kgwedi di tla dula di swana ebile di ka se fetoge goba tša angwa bjalo ka ditlamorago tša diphetogo. Dikholego tšeo di inšorilwego: khava ya poloko, bolwetši bjo bošoro le kotsi ya motho • Gabjale, maloko ka moka a baholegi a amogetše khava ya dikholego tša poloko, dikholego tša bolwetši bjo bošoro le ya kotsi ya motho go šomišwa dipholisi tša dihlopha tšeo di rekilwego ke Therasete ebile di thekgwa ke Sanlam Developing Markets Limited (“ Sanlam ”) ka mašeleng. • Le ge go le bjalo, ka lebaka la diphetogo ka gare ga molao wa inšorentshe, Therasete le Sanlam di ka no se sa tšwela pele ka dipholisi tša dihlopha.